Pencas de acelga rebozadas.

 

Ía poñer que era unha receta de aproveitamento, porque "aproveitei" que aínda non fresou ninguén a cortiña, e as acelgas siguen vivas...

A receta é o que di o seu nome, así que non esperedes virguerías. Pero están boas, e anque os fritos, rebozados, etc. non sexan demasiado sanos, comemos verdura ;)

Outra cousa: a parte verde das acelgas tamén se come! Eu desta volta leveilla ás galiñas (con algún cosco polo medio) porque xa eran follas algo vellas e roídas. Pero para salteados ou cocidos ou revoltos, o verde da acelga sirve perfectamente.

INGREDIENTES

• Pencas de acelga (a parte blanca, o "rabo" das follas da acelga)
• Fariña e ovos para rebozar
• Sal

TEMPO

O que é cociñar, pouco máis de media hora. Pero limpar as pencas pode levar máis tempo.

PROCESO 

Hai que empezar por limpar as pencas, sacándolles eses fíos ou teliñas que as recubren. A seguinte foto foi o meu "punto de partida" coas pencas sen limpar.

 

Cortándoas en cachos duns 8cm ou así límpanse mellor. Limpar as pencas pode levar bastante tempo se es detallista, pero podes facelo o día anterior, deixándoas na nevera nun cacharro con auga non lles pasa nada.

Este é un detalle dunha penca coa teliña a medio sacar.

Unha vez limpas, hai que cocelas. Uns 15-20 minutos son suficientes (fai falta que cozan case de todo, porque logo do rebozado a fritura é breve, e non se vai cociñar moito a propia penca. Ademais, a penca cruda ten un certo regusto amargo que non é moi agradable.

Unha vez cocidas, pasamos a rebozar e fritir.

Primeiro pasamos por fariña...

Logo por ovo batido (eu aproveitei aquí a poñer algo de sal, porque me esqueceu cando as cocín) ...

E finalmente, frítense. O aceite ten que estar ben quente, e as pencas deben nadar nel. Eu normalmente uso un cacharro relativamente estreito, para non desperdiciar moito aceite e conseguir altura. O da foto, o que usei neste caso, creo que era un fervedor do leite :)

Por certo: xa podes contar con tirar o aceite cando acabes de fritir. Entre a fariña, o ovo e as altas temperaturas queda feito un cristo. O de xirasol e compañía é máis barato...

Frite de poucas en poucas, para que estean separadas entre si. E cando as saques, ponas nun papel absorbente para que chupe o aceite que lles sobra.

E este foi o resultado final. Mal de todo non deben estar, porque as fixen a semana pasada e volvín a facelas esta (a pesar do coñazo que é limpalas, claro que as outras limpounas miña sobriña).

Bo proveito!