Rolo de bonito en salsa de curry tailandés

Xa sei que o normal é facer o rolo de bonito con salsa de tomate, pero a min gústame o curry, así que foi así. E, xa de postos, tampouco sei por que lle chaman rolo ou rollo de bonito cando de rolo non ten nada. É basicamente unha albóndiga gorda e estirada... en fin.

INGREDIENTES

Para o rolo:

• Bonito: pesoume uns 320g unha vez picado
• Cebola: uns 60g
• Pemento colorado: uns 60g
• Allo: eu usei allo picado con aceite, unha cullerada sopeira
• 2 ovos
• Pan relado, unhas 8 culleradas. Unha alternativa moio frecuente é usar molo de pan vello amolecido en leite.
• Sal e aceite
  
• Para rebozar usei 2 ovos máis e un prato de fariña.
  

Para o curry

• Cebola picada fina, un par de culleradas.
• Curry. Eu usei tailandés, unha cullerada sopeira.
• Leite evaporado. Tamén se pode usar leite de coco, pero dalle un toque demasiado doce.
• Caldo de peixe (de cocer a cabeza e unhas espiñas do bonito), unha cunca.

Para acompañar: unha cunca de arroz para cocer en branco.

 

TEMPO

Unha hora e cuarto aproximadamente.

PROCESO

Empezamos por picar, a coitelo, o bonito. Isto leva un cachiño...

 

Logo picamos fino a cebola e o pemento, e engadimos o resto dos ingredientes: 2 ovos, o allo picado, unha area de sal e o pan relado.

Amasamos á mau hasta conseguir a "pelota". Aquí hai que ter en conta que ten que aguantarse, e a textura conséguese engadindo máis ou menos pan relado, polo que é interesante empezar por 4 culleradas ou así, e ir amasando e engadindo pan ata que quede consistente.

Levamos para a neveira 15 minutos ou así. Despois facemos os rolos. Podería ser un só grande ou, como fixen eu, catro máis manexables.

Rebózanse en fariña e ovo.

Unha vez rebozados, frítense. Máis ben dóuranse, porque non hai que cociñalos demasiado, para que non queden demasiado secos. Hai que ter en conta que van cocer logo máis na salsa do curry.

 

Eu doureinos uns 3-4 minutos. Logo deixeinos nunha grella para que soltasen o exceso de aceite. Creo que é mellor opción esta que usar papel de cociña, que primeiro absorbe aceite e logo devólvello.

Mentras, podemos empezar coa salsa de curry. Empezamos "pochando" a lume medio-baixo a cebola. 

Cando está medio ablandada, engadimos o curry. No meu caso, pasta de curry tailandés "Panang".

 

Aplástase algo coa culler a medida que se vai fritindo e soltando os aceites.

 

Logo engádese o leite evaporado e o caldo de peixe e déixase cocer uns minutos. O leite suaviza algo o curry, sen el igual pica de máis (vai en gustos). E botando demasiado leite, ou usando leite de coco, disfraza demasiado o curry, na miña opinión.

Poñemos os rolos na salsa, e deixamos cocer, xirándoos de vez en cando, a lume medio, durante uns 15 minutos.

 

Finalmente quedaron con este aspecto.

 

 

E finalmente empratamos. Eu cortei o rolo, acompañeino co arroz cocido e puxen por enriba a salsa de curry. 

 

Estaba bo 😋.