Cebola rechea de carne picada

Un invento máis. A verdade, non é que estea mal a comida, pero non sei eu se merecerá a pena o traballo que da. 

INGREDIENTES

• Cebolas. Eu usei unha, que era un experimento.
• Carne: a suficiente para encher as cebolas que uses. Na da foto, sobrou carne.
• Allo: eu usei un par de culleradas do que teño picado e gardado en aceite.
• Salsa de tomate caseira.
• Viño branco (non sae na foto)
• Sal e pementa (tampouco na foto)

TEMPO

Unha hora, aproximadamente.

PROCESO

Empezamos por pelar a cebola e facer o oco para encher coa carne. Eu usei o descorazonador ou como centella se chame que sae na foto. Con que queden 2 capas basta. Eu quizás deixei algo de máis por medo a romper a cebola.

Para que ablande algo, metemos a cebola nun cazo cun dedo de auga, e a lume medio uns 10-15 minutos bastan.

Mentras a cebola ablanda, pasamos algo a carne. Boteille un pouco de allo, sal e pementa negra. Pensei picar e mesturar o que saquei da cebola, pero decidín deixalo para a salsa.

Deixamos que atempere algo a carne e a cebola, e enchemos o oco apretando algo (sen pasarse, non vaia romper todo!).

A tapiña queda moi mona ☺

Para a salsa: piquei o que sacara da cebola, e engadín unha cullerada de allo picado.

Unha vez está medio pochada, botamos medio vaso de viño. O outro medio para min. Poñemos a lume alto para que evapore algo do alcol.

Botamos o tomate. Eu botei algo máis da metade do bote, uns 200 gramos.

Metemos a cebola na salsa

Poñémola a lume medio-baixo tapada durante media hora ou algo máis. Podes ir pinchando para decidir cando está o suficientemente pasada. Así a salsa tamén reduce.

E este é o resultado.

Finalmente, foto para que se vexa como quedou por dentro. Quizás fose boa idea ter botado algo de cebola polo medio da carne, pero entón collía moi pouca carne.

Estaba bastante ben, non  houbo queixa. Pero sigo pensando que unha hora de traballo para isto... non sei se compensa. Claro que cociñar media ducia da pouco máis traballo e tempo, e hai para máis xente.