Tortas de lentellas coloradas

Fixen esta receta porque a vin nun vídeo deses "só cun ingrediente..." que pensei que sería outra tomadura de pelo, pero non. Vaia, auga fai falta, e eu usei algo de sal e un pouco de aceite para fritir, pero o que prima son as lentellas.

Non creo que sirvan as normais. A receta que eu vin, e como as fixen, son unhas lentellas coloradas (eu creo que as atopei en Alcampo) que son bastante pequenas (máis pequenas que as pardinas) e parecen estar peladas.

INGREDIENTES

Lentellas coloradas.
Auga para poñer a remollo
Unha pizca de sal
Aceite para ir "planchando" as tortas.

TEMPO

Aparte do remollo, eu diría que uns 5-6 minutos ou así por torta, pero non o calculei. Eu tardei unha hora máis ou menos en facer unhas 12.

PROCESO

Hai que poñer as lentellas a remollo unhas 8 horas. Eu deixeinas toda a noite. Como se ve nas fotos, aumentan o tamaño ó hidratarse.

Pasámolas a un vaso batidor (ou batidora normal se non o tés). Aquí podes aproveitar a engadir un pouco de sal (opcional). Fíxate en que hai 1 cm ou un pouco máis de auga por encima das lentellas. Que non teña moito máis ou o amoado sairá demasiado líquido.

Unha vez batido, a consistencia está como na foto seguinte. Máis consistente que o amoado das filloas, porque queremos que sexan máis gordas. Se está moi espeso podes engadir auga. Se está moi líquido... hai pouco remedio.´

Engrasamos un pouco a tixela cunha pinga de aceite.

Botamos un cazo do amoado, podemos extendelo algo para que quede como 1/2 cm de gordo. Non o movas agora. A lume medio/alto (eu tiña a vitro no 8 sobre 9) esperas a que se poida despegar (podes ir tentando cunha espátula).

Cando despeque, daslle a volta. Outro tanto tempo polo outro lado, e retira. A primeira, como pasa coas filloas, non é a mellor de todas, pero tampouco hai que tirala. Eu aproveitei a comela eu, e notar que estaba soso, así que engadín outro chisco de sal.

A continuación, varias fotos de varias tortas que fun facendo. O método é o mesmo: engrasar un pouco a tixela (limpar con papel se ves que hai restos queimados), botar un cazado, esperar a que se poida despegar, virala e deixala quieta onde caia, sen mover, ata poder despegala. Logo, retirar.