Iba poñer "estilo miña mai", pero anque empezo facendo coma ela, ó final boto un montón de trangalladas máis. Do de miña mai queda o de "fritir na tixela, botar despois na pota cunha cebola, auga e viño". O resto dos ingredientes... mea culpa.
INGREDIENTES
(comemos 7 e sobrou material)
- Medio pito (era grande)
- 2 cebolas
- 2 dentes de allo
- 1 folla de loureiro
- Pemento verde/colorado
- Viño branco
- Aceite, auga, sal
- Opcional: salsa Worcestershire (Lea Perrins)
- Opcional: patacas, se as queres de guarnición
Para adubar o pito usei:
- 2 dentes de allo
- Perexil
- Estragón
- Brandy
- Media guindilla verde
- Salsa de soja
- Vinagre de arroz,
- Aceite
- Sal
- Pimentón dulce
- Brandy
TEMPO
1 hora aprox.
PROCESO
A noite anterior adubei o pito.
Empecei por trocealo e regalo cun bo chorro de brandy, e revolvino ben.
Como estes Reis me regalaron un accesorio picador para a batidora, pois en vez de usar un morteiro, usei unha picadora.
Puxen un par de dentes de allo pelados na picadora, e triturei. Puxen encima unha presada de perexil fresco, e triturei de novo. Engadín media guindilla verde "made in" almería (son duns 10 cm de largo, e aínda pican; é opcional). Botei un pouco de estragón seco que tiña nun bote, sal, aceite e un par de cucharadas de café de pimentón dulce. Volvín a triturar. Para acabar, un chorriño de brandy, un chorriño de vinagre de arroz e unhas gotas de salsa de soja. Volvín a darlle ó botón para mezclar todo.
Finalmente quedou como na foto que aparece máis arriba, na tina amarela. A próxima vez que adube probablemente non leve o mesmo, porque eu son así e gústame improvisar, pero porque falten "cousiñas" que non sexa!
Quedou así repousando toda a noite.
O día de facer o asado, vai en 2 partes: por un lado fritir o pito, por outro pochar as cebolas e pimentos, e logo mezclar todo. Podes facelo en paralelo ou por partes, ti verás: )
O pito fritino nunha tixela. Máis ben doureino nada máis, anque para min xa case valía. A medida que estaba dourado, fun reservándoo nunha fonte.
Por outro lado, na pota onde vai quedar o asado, primeiro laminei e dourei uns allos, e logo botei a cebola e un pouco de sal para que "sude". Logo botei os pimentos. Neste caso collín unhas tiras que tiña meu cuñado conxeladas :) (moi boa forma de aproveitar cando tes demasiados pimentos na cortiña ou chos dan os veciños, jeje).
Se fosen frescos probablemente botaría a cebola e o pimento xuntos, pero como ó conxelar parece que collen algo de auga, pois neste caso deixei a cebola sola un cacho.
Cando estaba máis ou menos pochado todo, apaguei o lume, tapei a pota, e acabei de dourar o pito. Logo, botei todo xunto na pota. Boteille (colando) algo do aceite de fritir o pito tamén, e un bo vaso de viño branco.
Desde que levantou a fervedura (evapora alcol) botei un vaso de auga, e un chorro de salsa worcestershire (marca Lea&Perrins). Parece mentira o gusto que lle dan unhas simples gotas! É algo careira, pero recoméndoche probala.
Só falta deixar cocer, a lume medio, ata que estea. Canto tempo? Depende do gusto de cada un, pero con media hora ou 40 minutos debería ser bastante para que lle guste a miña mai (e gústalle que estea blando!).
Así quedou na pota cando xa estaba rematado.
Comentarios
Publicar un comentario