Gyozas (empanadillas xaponesas)

As gyozas son unhas empanadillas orientais (creo que de Xapón, pero outros din China e outros noutros sitios). En calquera caso, son empanadillas bastante versátiles, que poden cociñarse de varias formas. A máis habitual é tostalas algo nunha tixela e logo cubrir cun dedo de auga e cocer/cociñar ó vapor, pero tamén se poden meter en sopas, no forno, nas air fryer... 

Cando se fan, é interesante facer moitas á vez e conxelar. Total, cociñalas de conxeladas (sin desconxelación previa) tardará un minuto máis.

INGREDIENTES

Para o recheo:

• Carne mesturada (cocho e xato), medio kilo máis ou menos 
• 1 cebola mediana
• Un cuarto de repolo
• Allo (eu usei unha cullerada de pasta de allo que fixen eu, triturando allo e metendo en aceite)
• Sal
• Salsa de soia

Para a masa:

• 300 g de fariña normal
• 150 g de auga fervendo (si, úsase fervendo, e vai pesada, a metade de peso da fariña)
• Unha pizca de sal

Tamén fixen unha salsa básica, metade salsa de soia, metade vinagre de arroz, e unha pizca de salsa hoisin (especie de salsa barbacoa china).

NOTA: Con estes pesos, hai demasiado recheo para a cantidade de masa. Ó final tamén fixen albóndigas 😇

TEMPO

Depende da cantidade de gyozas, porque empaquetar unha por unha leva tempo. O resto do proceso é rápido en xeral (10 min mezclar recheo, 10 minutos amasar, 10 minutos fritir). Para 36 gyozas, sen fritir (eu conxelei) estiven hora e pouco.

PROCESO

Picamos a cebola e o repolo. Eu usei o accesorio picador da batidora, para que quedara ben pequeno. Logo mesturamos todo.

Despois hai que AMASAR a mestura, apretando a mau e que saia a carne polas beiras, cerca de 10 minutos. Con isto rompemos as fibras, queda máis "masa" que carne picada, e así poden collerse cachos máis pequenos para meter  en cada empanadilla. É parecido a cando queremos facer albóndigas pequenas. Esquecín sacar foto da "masa", pero nas fotos das empanadillas sin cerrar pode verse algo da textura que tiñan.

Unha vez feito o recheo, debe repousar uns 20 minutos ou así. Eu aproveitei para facer a masa.

Como dicía nos ingredientes, estes van pesados, e é a metade de auga que de fariña. Poñemos a fariña no bol, a pizca de sal, e botamos a auga fervendo.  Amasamos cunha culler de madeira ou similar.  Cando estea manexable pola temperatura, metemos as maus.

Vai parecer que falta auga, pero non te apures a engadir. Eu engadinlle un pouco (quente) e logo tiven que engadir algo de fariña. É unha masa de hidratación moi baixa (50%, vaia).

Deixamos reposar 10 minutos ou así. Logo espolvoreamos fariña na mesa e estiramos.

Hai xente que fai "churros" coa masa e logo corta en pedazos pequenos e estira un disco de cada cacho, pero a min ese sistema paréceme pouco eficiente. Eu comprei un cortamasas (9 cm) e o que fixen foi estirar todo e cortar discos. Estira para facer a masa moi fina, de 1 mm ou así de espesor como moito.

Así fun sacando os discos. Os restos que quedan volven a amasarse, estirarse e cortarse, ata acabar a masa.

Mostrar o proceso de facer a gyoza sen vídeo igual é complicado, pero é o que hai.

Poñemos un pouco de masa no centro do disco. Aquí pode verse máis ou menos a textura coa que quedou a carne:

Mollamos o borde con auga para que pegue mellor, e pegamos a zona central.

E despois imos plegando (2-3 plegues por lado) para facer a típica forma de media luna.

E quedan así: A parte de abaixo é plana (interesante para poder tostar ese fondo).

E agora... continuar. A min deume para 36 gyozas. Se as vas cociñar xa, cociña. Se non, conxela.

Refírome a que non as fagas ás 2 da tarde para fritir ás 6 da tarde, porque a masa vai escangallarse. Ou as cociñas xa, ou as conxelas. Eu púxenas na bandexa separadas, e cando conxelen de todo xa podo metelas nunha bolsa, que non se van pegar.

Para cociñar as gyozas conxeladas non hai que desconxelar, póñense directamente no recipiente. Simplemente, levaralles un minuto máis cociñarse. Eu conxeleinas todas.

 E, como dixen, había máis recheo que masa, pero non quería amasar máis. Así que fixen albóndigas para conxelar tamén.

Outro día cociñei as gyozas. Como digo, directamente do conxelador á tixela, sen desconxelar.

Poñemos un pouquiño de aceite, e as gyozas encima, e dourámolas (só o fondo, que se fixo plano para isto precisamente).

Podemos xirar de vez en cando algunha para ver se están douradas, como na foto.

E en canto estean, poñemos como un dedo de auga (máis ou menos medio vaso) e tapamos. Cociñamos a lume medio-alto uns 5 minutos.

E cando estean así, deixamos un minuto máis destapado.

E xa está, Poñemos nun plato, e comemos. A salsa é opcional, pero é moi simple e está boa. Incluso poñendo só salsa de soia e vinagre de mazá, que o vinagre de arroz e a salsa hoisin igual están máis complicados de conseguir.

Están moi boas, sobre todo se che gusta a textura gomosa coa que queda a masa.