Xarrete (osobuco) ó viño branco

Case sempre que compro xarrete eu cózoo, porque me gusta así e aproveito a auga de cocer como consomé. Pero este tiña tan boa pinta para asar que non me resistín.

Facer un só seguindo esta receta, para unha persoa (sobra a metade) creo que é un pouco perder o tempo, pero tampouco vou dicir que estaba malo. Facer catro xuntos para máis xente leva o mesmo traballo e igual incluso sabe mellor. Por certo, que eu usei viño branco porque as salsas feitas con viño tinto a min fánseme normalmente demasiado fortes.

INGREDIENTES

• Un pedazo de xarrete ou osobuco. O meu pesaba medio kilo aproximadamente.
• Verduras ó gusto. Eu usei allos, cebola, ceboleta, champiñóns portobello, pemento colorado e cenorias.

Acompañeino con puré de patacas, que levaba pataca e algo de leite para poñelo máis meloso, e algo de perexil (non saen na foto).

TEMPO

Unha hora ou hora e cuarto (ola exprés).

PROCESO

Primeiro salpementamos a carne e picamos as verduras (eu aproveitei xa a foto previa). 

Despois cubrimos o fondo dunha pota con aceite e douramos ben o xarrete polos dous lados (incluso algo polo lado aguantando con pinzas). Eu xa usei a pota exprés porque así fago todo no mesmo recipiente.

Máis ou menos así por un lado. A lume medio-alto tárdase en total un 5 ou 6 minutos.

Aquí vese que se descompón algo por culpa da teliña exterior. Corteina cunhas tixeiras para volver aplanar o xarrete.

Retiramos o xarrete a un prato. Eu tamén saquei un pouco de aceite da pota. Pochamos as verduras a lume medio uns 4-5 minutos.

Botamos o viño, medio litro máis ou menos. Deixamos a lume alto uns 5 minutos para que evapore o alcol.

Volvemos a poñer a carne na pota. Eu non engadín líquido (hai quen engade caldo ou auga, pero había líquido bastante porque na exprés non se perde case nada).

Tapamos a pota. Eu puxen un temporizador de 42 minutos. En canto colleu temperatura baixeina, acabei tendo case todo o tempo a temperatura no 3 de 9 da miña inducción.

Mentras se coce, aproveitamos para adiantar o puré de patacas. Peladas e cortadas, e con algo de sal, cocémolas ata que estean blandas. Uns 20 minutos máis ou menos, depende da pataca tamén.

Despois dacemos o puré. Eu teño o pisapatacas da foto, pero con tenedor tamén vale se están blandas.

Como se ve, queda como granulado gordo.

Eu engádolle leite (medio vaso) e vou revolvendo. Puxen tamén un pouco de perexil picado.

Cando acaba o tempo do xarrete, abrimos a pota (despresurizando con xeitiño) e sacamos a carne. Eu xa a saquei en pedazos porque se separan ó estar tan cocido. As verduras quedan na pota.

Hai quen separa as verduras, cola a salsa ou que sei eu. Eu o que fixen foi pasarlle a batidora a todo xunto.

Volvín a carne uns momentos á salsa xa triturada, e logo emplatei a carne, salseando por encima, e poñendo o puré de patacas. Estaba bo, estaba blando, quizás me quedei un pouco corto de sal... pero vaia. Unha comida distinta. Comín a metade nada máis, o resto para a cea ou mañá 😅