Edamames salteados con salsa picante

Os edamames son bagullos de soia collidos en verde. Son orientais, diría que típicos de Xapón. Normalmente atópanse conxelados. 

Esta receta é máis un aperitivo que outra cousa, aínda que a soia ten moitas proteínas. Ah, só se comen as fabas, o bagullo parece ser que non. E a salsa está feita cun montón de cousas medio raras, moitas pilladas nun supermercado asiático.

O común das recetas é: 1) cocer directamente os bagullos conxelados, e 2) aliñar e comer. Pero hai variantes no tempo de coción (de 3 a 5 minutos, din a maioría) e por suposto no aliño.

En fin, serviron de cea. A salsa para rechupetear está moi boa. As fabas de soia, pois nin fú nin fá. Terei que volver a facelas para sacar as que quedan no conxelador.

INGREDIENTES

• Edamames (usaría uns 300 g)
• Sal
• 2 culleradas de aceite de oliva
• Allo picado ou granulado (usei granulado)
• 2/3 culleradas de salsa de soia
• 1 cullerada de salsa de ostras
• 1 cullerada escasa de zume de limón
• 1 cullerada de aceite sésamo
• Semente de de sésamo (quería negro pero atopei o branco)
• Aceite de chile (tipo Lao Gan Ma, por exemplo, ou feito na casa, que foi o que usei) 
• Caienas trituradas.

TEMPO

Uns 10 ou 15 minutos

PROCESO

Poñemos auga a ferver. Os bagullos estaban así, sen desconxelar.

Cando o cazo da auga ferva, botamos os edamames, que eu cocín 5 minutos desde que volveu a ferver a auga. Hai que non lle bota sal (a salsa levará salsa de soia que xa é salada) e hai quen lle bota moito porque como os bagullos non se comen, que pase algo ó interior. Eu botei unha presada (como unha cullerada sopeira).

Empecei xa coa salsa, poñendo aceite de sésamo e aceite de oliva. Cando quenceu botei a semente de sésamo (tiña branco sen tostar, non sei onde metín o negro). E allo granulado, porque tiña pouco allo normal. Supoño que tostar primeiro o sésamo sen aceite estaría ben, e usar allo de verdade picado, pero é o que hai.

Unha vez se tostou algo o sésamo e o allo, engadín unha cullerada de salsa de ostras (a parte de abaixo, máis densa) e 2 ou 3 de salsa de soia. Lume medio-baixo e remexendo de vez en cando.

Despois foi o aceite de chile con algunha caiena triturada a maiores, e un chorro de zume de limón.

Escúrrense os edamames (non os pasei por auga, simplemente nunha escurrideira) e boteinos na tixela para ir salteando algo coa salsa.

E nada máis. Emplatar e comer. Hai quen os prefire fríos. Eu non.

Aquí un detalle: ó apretar saen as fabas, e normalmente métese o bagullo na boca para chupetear na salsa, pero só se comen as fabas. O bagullo en sí é demasiado fibroso.

E nada máis. Nin para tirar cohetes nin para tirar ó lixo. E si, a salsa moi boa. O engadido da salsa de ostras, que inicialmente igual non ía levar, fíxolle moi ben.