Croquetas de churrasco

Xa facía que non escribía... esta é outra receta de aproveitamento, claro :)

Como o churrasco requente a min non me gusta demasiado, pois probei a ver que tal sabían as croquetas feitas coas sobras. E non están mal, non.

INGREDIENTES

• Churrasco que sobrou da comida (había 8 ou 10 costelos)
• Perexil (opcional)

Para a bechamel

• 3 culleradas de Fariña
• 3 culleradas de aceite e/ou manteiga
• Sal
• 3/4 de libro de leite aproximadamente

Para o rebozado

• Fariña
• Ovos (2 ou 3)
• Pan relado

PREPARACIÓN

A preparación é igual que o resto das croquetas, pero como cada un as fai como quere, pois aquí vai como as fixen eu.

Para empezar,sacamos a carne das costelas e picámolas. Eu usei o accesorio picador dunha batidora, e botei un pouco de perexil polo medio, pero todo é opcional.

Para facer as croquetas, o fundamental é facer a bechamel, e que quede bastante consistente, se non á hora de facer as croquetas desfaise todo. Pero o proceso é similar ó que expliquei para a bechamel da musaka.

Primeiro, botamos 3 culleradas de aceite ou manteiga, ou mezcla. A min gústame botar das 2 cousas. Se botamos só a manteiga hai que quentalo pouco a pouco senón pode queimarse ou separar o suero da graxa.

Botamos outro tanto (3 culleradas sopeiras) de fariña, e unha pizquiña de sal.

Cociñamos a fariña un par de minutos. Se non o facemos, a croqueta saberá a fariña crúa, e non é moi agradable. Cando teña a textura e color da foto, podes empezar a botar leite.

Non sei se o dixen xa noutra entrada ou non, pero é importante: ter unhas varillas para facer a bechamel fai que quede moito mellor e faise máis fácil. E costan algo así como un euro en calquera lado...

Empezamos a botar leite pouco a pouco e imos revolvendo. Como se ve na foto, non está o lume alto de todo, está no 8 (a veces 7) de 10, e a vitrocerámica esta de miña mai non é excesivamente potente.

Imos engadindo leite e revolvendo sen parar.  Non te apartes do lume, que esto en 20 segundos que o deixes só quéimase. Eu apureime a sacar as fotos :)

Cando estea xa feita e teña unha consistencia algo gorda, damos por rematada a bechamel. Engadimos a carne picada e seguimos ó lume revolvendo un minuto ou así.

Hai quen bota a carne (ou o que sexa que leven as croquetas) ó principio coa fariña. A min paréceme máis fácil botalo ó final. Igual a bechamel colle máis sabor da outra forma, non sei, pero non creo que cambie de forma de facelas.

Botamos a mezcla nunha fonte ancha para que enfríe. Desde que atempere podes poñela na nevera. Hai que esperar bastante (eu normalmente déixoa na nevera un par de horas polo menos).

E o paso final: facer as croquetas. Non é difícil, pero mancha bastante. Hai que ir facendo as boliñas, e ir pasándoas (por este orden) en fariña, ovo e pan relado.

Como normalmente non imos comer todas as croquetas que se fan, podemos conxelalas. O que eu fago é coller unha fonte do forno (vale calquera outra cousa), forrala con papel de aluminio, e ir poñendo as croquetas sen que se toquen entre si, coma na foto. Meto todo así no conxelador, e unha vez que conxelen xa non se pegan, así que podo sacalas da bandexa e poñelas nunha bolsa.

 O resultado final: fritimos as croquetas en abundante aceite, e escurrímolas en papel de cociña. Estaban bastante boas :)