Filloas

Din que son para o Antroido, pero eu son moito de levar a contraria, así que as fago o 1 de decembro. Pasa algo? :)

Tamén hai tantas recetas de filloas como casas onde se fagan filloas: con leite ou sen leite, con caldo ou con auga, con levadura ou sen ela, de sangue,... eu fixen estas que me parece que non quedaron mal... porque non quedou ningunha. Coméronse todas.

INGREDIENTES

• 8 ovos
• 11 cucharadas sopeiras (ben cheas!) de fariña
• sal (ó gusto)
• 70 cl de auga

(Desta vez medín os ingredientes! menos o sal, claro)

TEMPO

Facer o amoado non leva moito, pero facer as filloas leva bastante. Eu creo que estiven unha hora ou así, pero o tempo non o controlei moito.

PROCESO

Para facer o "amoado" (así lle chaman na miña casa):

Cascamos e batemos os ovos. Mezclamos coa fariña e a auga, e botamos o sal. Case da igual en que orden o fagas. Logo mezcla ben todo. Eu usei unha batidora para deixalo homoxéneo. 

Non saquei fotos dese proceso, nin do aspecto final da masa. Non é moi importante o non ter a foto, o importante é a textura coa que queda e iso non se percibe moi ben en foto. Tería unha textura pareceida á da pintura ou á da cola blanca de pegar madeira (quizás un pelín máis lixeiro). Isto non sei explicalo mellor.

Logo tes que usar unha tixela ou similar. Eu tiña unha "filloeira" (unha tixela cos bordes moi baixos), pero estaba algo abombada e non se aguantaba ben, así que usei unha tixela normal.

Hai que engraxar o fondo da tixela pero que non quede aceite goteando. Na miña casa facíano cun cacho de touciño, pero agora os cochos deben estar máis a dieta e non son tan "grasosos", así que o que fixen foi ter unha cunquiña con aceite, e mollar o touciño no aceite e restregar polo fondo da tixela antes de botar o ingrediente para cada filloa.

Botas o ingrediente para unha filloa. Como cálculo aproximado, un cacillo ou garfelo pequeno da sopa da para unha tixela de 32cm de diámetro, pero iso terás que ir mirándoo ti.

Extendes ben o amoado (colle a tixela e inclínaa en varios sentidos para que ocupe todo o fondo e quede redondeado). Cando a masa estea callada (verás os bordes xa secos) hai que virala. Podes lanzala ó aire e recollela (eu teño feito iso con distintos niveis de éxito...) ou coller cos dedos por un dos bordes e darlle a volta. Esta segunda forma é máis segura, e non está tan quente como para queimarse.

Vas facendo e apilando nun prato. Se hai xente ó redor podes aproveitar o cazo ou a tixela para espantalos.

Despois toca comelas. Se lles deixas enfriar empachan algo menos. 

O normal na miña zona é comelas tal como están, simplemente botándolles un pouco de azúcar por encima, pero como eu non tiña pan e tiña algo de fame e cousas na neveira, pois o que fixen foi botar un pouco de guacamole e uns cachiños de chourizo...

... plegar en catro, sacar a foto, e p'adentro! Outro éxito!