Flan de ovo

Collemos o sobre do flanín e ... naaaaaaaah :)

Flan de ovo caseiro! Tendo en conta o "ben" que nos levamos a respostería e mais eu, isto foi un gran paso... incluso fixen o caramelo. Iso si, quedou floxo e case non se ve.

INGREDIENTES

• 8 ovos
• 1/2 litro de leite
• Azúcar: 8 cucharadas sopeiras rasas para o flan, unhas catro para o caramelo.
• Unhas gotas de limón para o caramelo

TEMPO

Uns 5 minutos para a preparación, incluído o caramelo.

Unha hora aprox. de forno.

Esperar que enfríe... eu esperei 3 horas (fun tomar unhas birras, non me quedei de paspán mirando!)

PROCESO

Empezamos polo caramelo. Ollo que queima moito, e pégase, así que hai que andar con moito xeito e botar fóra da cociña os pequerechos se os hai :)

Pon ó lume unha tixela completamente baleira e seca, e bota unhas 4 cucharadas de azúcar. Podes botarlle (realmente é opcional) unhas gotas de auga ou de zumo de limón. Din que fai o caramelo máis líquido e que non se pegue tanto, pero a min quedoume medio mal e cando desmoldei nin vin o caramelo. 

Quizás foi porque lle botei demasiadas gotas de limón. Mira para as fotos, e bota menos. Ou non botes.

Eu tiña o lume a medio/alto (7 de 10 creo recordar). Non revolvas o azúcar con nada. Se queres podes mover a tixela en círculos, pero sen tocar o azúcar con nada. Ó pouco empezará a facer burbullas.

Dalí a un pouco (un minuto ou así, pero depende do lume) empezará a cambiar de cor.

Eu apartei a tixela do lume con esa cor, e botei o caramelo no fondo dunha pota que iba usar como flaneira. Non teño flaneira porque como dicía, eu e a repostería e a repostería e eu non facemos demasiadas boas migas.

Pois así foi como quedou o fondo da pota. Se o fas, deixa que o caramelo se queime máis, que colla unha cor negruzca. Pero sen pasarse, que se non amarga en vez de endulzar. E quizás podes botarlle máis cantidade de azúcar, depende do que che guste.

Para o que é o flan, a proporción que a min me deron foi de unha cucharada sopeira RASA de azúcar por cada ovo. Se che gusta máis dulce, pois que non sexa "tan rasa". 

Cascamos os 8 ovos.

Botamos as 8 cucharadas de azúcar, e batemos. As varillas son moi boa cousa para estes tinglados.

Engadimos medio litro de leite.

Batemos de novo ata que quede unha crema homoxénea.

Metemos a "flaneira" no forno. Non sei se se aprecia na foto, pero aparte da merda que ten a bandexa, ten como un dedo de auga. É dicir, que o flan faise ó forno ó "baño maría".

A temperatura, según me dixo o amigo Antonio que me deu a receta, é "algo menos que para facer pan", que ven sendo uns 200ºC. Así que puxen a roda da temperatura un chisco menos deses 200. 

E deixamos o flan no forno durante uns 50 minutos ou unha hora. Podes ir mirando se colle consistencia (atanegando un pouco a pota, en algún momento para de moverse a crema). 

Se ves que se queima por encima (mira a seguinte foto) podes poñerlle un pedazo de papel de aluminio por encima.

E saberás que o flan está feito se metes un coitelo e sae limpo, sen que se pegue nada na folla.

Algo así como nesta foto.

Deixa que atempere durante media hora ou así, e logo méteo na nevera.

Cando xa estea frío, podes desmoldar. Pon un plato encima da pota, e dalle a volta. Debería despegarse. Eu paseille un coitelo polas beiras antes, pero creo que non facía falta.

O resultado final foi o que se ve nas fotos. Unha de planta e outra de alzado, hala!

Como se ve tamén (máis ben "non se ve") non hai rastro do caramelo, salvo algo líquido que escorre. Para a próxima teño que facelo mellor.

Opinións, entre a sobriña pequena, que non o quixo probar, e miña mai, que dixo "cando veñas pra semana que ven podes facer outro", haberá de todo, pero non quedou nada. 

Eu probeino e tamén me gustou. O meu primeiro postre medio decente!