Bolos preñados

 

Bolos preñados: bolos de pan con chourizo dentro. Poden facerse grandes, cun chourizo enteiro, ou pequeniños (tipo tapas dos bares) con zorza ou cachos de chourizo. Se é dos estoupós, algo verde, mellor, que a masa queda máis xugosa.

Tamén se poden facer de outras cousas aparte de chourizo, anque os clásicos son os de chourizo. A min sobroume un pouco de masa, e tiña algo de bonito en conserva (natural) que me regalaron, e serviu para o caso.

INGREDIENTES

• Fariña (usei 2 vasos de 25cc, non a pesei)
• Sal (unha pizca, non pesei tampouco) 
• Levadura de panadería (usei 25 g, un paquete da que comprei no Eroski)
• Chourizos estoupós (1 e medio)

TEMPO

5 minutos amasar, unha media hora para levedar a masa mentras se pica o chourizo. Para cociñalos depende: se os frites uns 5-10 minutos, se os fas ó forno uns 30-40 minutos.

PROCESO

Empezamos por amasar, coma nas outras recetas que teño no blog: mezclamos a levadura con auga (medio vaso ou así), e logo coa masa. Imos revolvendo e vendo se necesitamos algo máis de auga. Amasar 5 minutos polo menos deixa a masa máis esponxosa.

 

Despois deixamos repousar, tapada, media hora ou así. Eu aproveitei para picar os chourizos. Vemos que aumentou o tamaño. Anque na foto parece igual de grande que o anterior, fixádevos no tamaño do cacharro azul, que é o mesmo nas 2 fotos. Non encolleu, saquei a foto co teléfono algo máis separado :)

Logo imos collendo cachos de masa, aplastámoslos, poñemos un pouco de chourizo e envolvemos e facemos unha bola para ter os boliños.

A min sobroume masa/faltoume chourizo, escolle a que queiras. O remedio foi coller un pouco de bonito que tiña na neveira, para facer o que me quedaba de bolos (que deu para 2, un grande, retorto e aplanado).

A miña idea era probar os bolos de 2 formas: fritos en aceite, ou ó forno.

Para os fritos fixen os bolos un pouco máis pequenos.

 

Pos un cazo ou similar con aceite suficiente para que cubra os bolos (eu uso un fervedor de leite vello porque é máis estreito e así boto menos aceite). Cando estea quente o aceite pos os bolos, e frítelos ata que estean dourados. Podes ir dándolles volta de vez en cando (estarán flotando no aceite).

 

Cando estean dourados, sácaos a un papel absorvente.

 

Este é o aspecto dos boliños por dentro.

Os demáis púxenos nunha placa para ir ó forno, pero non puxen o forno porque non eran horas (cousas de empezar estes tinglados a medianoite), así que os deixei no forno apagado ata o día seguinte ás 2 ou así.

Como se pode ver, nesas 14 horas seguiu levedando algo a masa, e fíxose algo máis grande algún dos bolos.

Media hora (igual pasaba uns minutos) a 200ºC, e retireinos do forno con este aspecto.

Como vin que fan especialistas coas empanadas, collín unha brocha e unteinos con aceite según os saquei do forno. Igual me pasei de aceite, igual non lles facía falta ... pero eu creo que un pouco si que lles ven ben.

Ah, o espatelado da dereita é o grande de bonito :)

E logo saqueinos para un plato, e fomos comendo. Miña sobriña di que lle gustan máis os do forno que os fritos. E serán algo máis sanos, digo eu ... a min gustáronme todos!