Tempura de verduras e langostinos

Esta vez non é unha receta de aproveitamento, todo foi comida nova :)

Quería facer algo usando tempura, e escollín verduras e langostinos.

INGREDIENTES

Estes ingredientes usáronse para 2 persoas.

• 250 gramos de langostinos
• 2 cenorias
• Medio pemento verde
• Medio pemento vermello
• 3 champiñóns
• 3 espárragos verdes
• Medio calabacín

Para facer a tempura

• Fariña de arroz 
• Auga moi fría 

Como acompañamento

• Salsa de soia

 PREPARACIÓN 

Primeiro hai que trocear as verduras e pelar os langostinos deixando a puntiña do rabo como se ve na foto. As verduras deben quedar en cachos bastante pequenos, "de bocado". Se os comes cos palillos chinos, que poidas meter cada cacho na boca. Eu neste caso piquei o calabacín demasiado grande, e por iso non quedou demasiado cociñado. Hai que ter en conta que a fritura vai ser bastante rápido, polo que todo vai quedar bastante al dente. Na imaxe hai unha mostra de como foi troceado.

Logo, hai que facer a tempura, que basicamente é unha masa semilíquida de fariña e auga, espesa, para rebozar. Non teño moi claro cal é a mellor fariña para facela. Teño oído que mesturando fariña de trigo e fariña refinada de millo sae ben, outros din que vale calquera, outros din que de arroz. Eu optei por probar con fariña de arroz. A da foto compreina nun supermercado chino, pero agora xa se atopan en case calquera supermercado.

Botamos a fariña nun bol, e botamos auga moi fría.Mesmo se pode usar xeo para enfriala máis aínda. O motivo de usar a auga moi fría parece ser evitar que a masa hinche (anque non vai levar levadura), e así queda unha capa máis fina e semitransparente. Debe quedar unha consistencia espesa, similar á do mel ou á da bechamel que se usa nas lasañas ou nos gratinados como os de coliflor, etc. É medio complicado definir de palabra a textura :)

As fotos mostran máis ou menos como me quedou a min. Realmente, debería ser un poco máis espeso aínda (ó non sacar o xeo foiseme licuando e por iso perdeu consistencia).

O seguinte paso é ir fritindo. Debe usarse aceite abundante e bastante quento, e a fritura será rápida (non mirei o tempo, pero un par de minutos ou así bastarán). Cando se retira da tixola (cazo no meu caso) debe poñerse en papel absorbente.

Tamén é importante ir rebozando e poñendo a fritir inmediatamente, non deben deixarse moito tempo na tempura fría.

Para os langostinos, o normal é rebozalos deixando fóra a puntiña do rabo para agarrar (parecido a cando se fan á gabardina).

 

Unha vez se ten todo frito, podemos pasar á parte interesante, que é comelo. Pode poñerse un bol con algo de salsa de soia para mollar os bocados. Tamén nesto das salsas de acompañamento hai moitas variantes. Proba!