Sardiñas en tomate... aquí ven unha receta sinxela, rápida e que polo menos a min gustoume (pero iso non di nada, porque a min gústame case todo...). O outro día probei vez facéndoa con parrochiñas e está igual de ben. Incluso pode reducirse un pelín o tempo de cocción.
Aparte do rápido da receta, ten unha boa ventaxa tratándose de sardiñas: non dan practicamente nada de olor. Así que puiden facelas no piso sen problema.
INGREDIENTES
- Sardiñas (4 no meu caso)
- Un bote de salsa de tomate (se é caseira, mellor que mellor)
- 2 dentes de allo
- Media cebola
TEMPO
Indo despacio, entre 15 e 20 minutos. Co repouso final pode variar algo, pero é unha comida rápida (que non "fast food"!).
PROCESO
Laminamos os allos e poñémolos a dourar nunha tixela. Xa podemos ir picando (menudiña) a cebola.
Cando estean dourados os allos, botamos a cebola, un pouco de sal, e baixamos o lume (para que "sude" e quede pochada e non dourada).
Cando a cebola estea pochada (aí vai ó gusto), botamos a salsa de tomate. Subimos algo o lume ata que empece a globear.
Engadimos as sardiñas. Por certo, eu non lavo nin abro as sardiñas, van con tripa. Como moito paso un papel de cociña para sacar escamas soltas. Tampouco lles puxen sal, que a salsa de tomate xa leva, e a cebola tamén. Non fai falta que a salsa de tomate cubra as sardiñas. Eu boteilles algo por encima coa cuchara, pero non creo que fixera falta.
Témolas a lume medio uns cinco minutos (que o tomate fafa algo de "chup chup", pero que non ferva). Tapamos e deixamos que repouse outros cinco minutos. En serio: cinco minutos cociñando, non máis. E outros cinco repousando. E quedan perfectamente feitas.
E xa está. Emplatamos ou comemos na tixela, a gusto do consumidor.
Pode facerse algunha guarnición tipo arroz blanco, patacas cocidas, etc., pero eu decidín usar pan de guarnición ;-)
Comentarios
Publicar un comentario