Receta fácil e rápida se tes con que relar os calabacíns para facer os espaguetis. A min saírone máis ben uns medio macarróns, porque usei o accesorio de relar da batidora, pero tiven que cortar ó medio o calabacín e así non saen espaguetis algo longos.
INGREDIENTES
- Gambas, uns 200 gr. Eu usei das conxeladas
- 2 dentes de allo
- Unha guindilla
- Orégano (igual podía omitirse, ou engadir outras especias
- Tamén usei (non sae na foto) unha pizca de pemento doce e un pouco de queixo relado.
TEMPO
Media hora máis ou menos
PROCESO
Relamos o calabacín e fileteamos o allo. Aquí hai varios métodos: co coitelo (levaría máis tempo, e ó mellor sae máis gordo), con accesorio relador (o que fixen eu, e como dixen ó non coller ben o calabacín tiven que cortalo ó medio lonxitudinalmente, e saíron cachos cortos), co pelador de patacas (sae máis ben fetuchini ☺) ou con accesorios especiais como un espiralizador, que parece un afilalápices onde metes o calabacín e saen espaguetis largos). Cada un que use o que prefira.
Poñemos a tixela ó lume, un pouco de aceite, e a dourar os allos coa guindilla.
Cando estean dourados, poñemos as gambas. Como as miñas eran conxeladas, paseinas por auga para medio desconxelalas antes. Sabería mellor se fosen frescas e grandes, supoño.
Aquí puxen un pouco de pemento doce (media cucachiña do café ou así) mentras se facían as gambas, que soltaron algo de auga. Retirei un pouco da auga, non toda. Debin ter as gambas 5-6 minutos cociñando. Despois, botei o calabacín, dinlle unha volta e apaguei o lume (deixei a cazola encima da vitrocerámica, que conserva calor). Aproveitei para botarlle un pouco de queixo relado e revolver outro pouco.
E despois duns 2-3 minutos, non máis, para o prato. Teño que dicir que a min non me gusta a comida demasiado feita, así que para outros igual fai falta un pouco máis de tempo, ou non apagar tan axiña o lume.
O resultado final no prato foi este. Non está mal, e é algo diferente. Repetirei.
Comentarios
Publicar un comentario