INGREDIENTES
Para cocer- Unha ala de raia
- Patacas
- Cebola
- Sal
- Allos
- Aceite
- Pementón doce
- Unto (opcional)
- Guindilla (opcional)
- Vinagre (opcional)
TEMPO:
Uns 25 minutos
PROCESO:
Pelamos e picamos as patacas (eu fixen rodas) e a cebola e poñemos a cocer.
Eu utilicei media ceboleta porque non tiña máis. De ter, usaría unha cebola grande ou 2 pequenas. Apuntamos cando empeza a ferver porque ós 12 minutos ou así hai que engadir a raia.
Partimos a raia en catro cachos e imos preparando o tema para facer a allada.
Podemos botarlle xa un pouco de sal á raia. Hai a quen lle gusta con pementa tamén, pero eu decidín non botarlla.
Botamos algo de aceite nunha tixela e poñemos o allo, a guindilla se nos gusta, e o unto.
Eu utilicei allo con guindilla que tiña nun bote, xa picado e macerando en aceite (e usei parte do aceite do bote).
Persoalmente, nunca usara antes unto nunha allada (nin o vira, pero revisando algunha receta desta caldeirada vino, e probei). A verdade, non llo notei despois ó comer, así que igual sigo utilizándoo só para o caldo ☺.
Cando o unto estaba derretido e só quedaba esa parte central que está na culler, retireino. Como os allos estaban dourados apaguei o lume.
Aínda co lume apagado, a calor residual seguía dourando os allos, así que os retirei a un cacharro de cristal. Deixei que enfriara algo e botei o pemento doce (Pimentón de La Vera no meu caso). Botei unha cullerada sopeira (tampouco tiña máis). Creo que a xulgar pola cor da imaxe da dereita aínda tiña calor de máis. Tamén lle engadín un chorro de vinagre de viño branco.
Cando pasaron os 12 minutos desde que fervían as patacas, botei a raia e volvín a tapar a pota.
E despois de 10 minutos estaba así. A verdade é que reduce moito o tamaño, como se pode ver.
E só queda poñer no prato unhas patacas e cebolas, algo de raia, e poñerlle por encima a allada. Este é o resultado final. Mmmmh, non. O resultado final foi o prato baleiro (vale, cos cartílagos da raia).
Comentarios
Publicar un comentario